പുതുമുഖ നടിയെ ബലാല്‍സംഗം ചെയ്ത കേസില്‍ നടനും നിര്‍മാതാവുമായ വിജയ് ബാബു അറസ്റ്റില്‍. എറണാകുളം സൗത്ത് പോലീസാണ് വിജയ് ബാബുവിന്റെ അറസ്റ്റ് രേഖപ്പെടുത്തിയത്. ചോദ്യം ചെയ്യലിനായി വിജയ് ബാബു ഹാജരായിരുന്നു. ഇയാളെ തെളിവെടുപ്പിനായി കൊണ്ടുപോകും. കൊച്ചിയിലെ ഹോട്ടലുകളിലും ഫ്‌ളാറ്റുകളിലുമാണ് തെളിവെടുപ്പ്. പനമ്പിള്ളി നഗറിലെ ഫ്‌ളാറ്റിലായിരിക്കും ആദ്യമായി തെളിവെടുപ്പിന് എത്തിക്കുക.
മുന്‍കൂര്‍ ജാമ്യം നിലവിലുള്ളതിനാല്‍ സ്‌റ്റേഷന്‍ ജാമ്യത്തില്‍ വിട്ടയക്കുമെന്നാണ് സൂചന. ജാമ്യത്തിനായി അഞ്ചുലക്ഷം രൂപയും രണ്ട് ആള്‍ജാമ്യവും നല്‍കണമെന്നും കോടതി നിര്‍ദേശിച്ചിരുന്നു. അറസ്റ്റ് രേഖപ്പെടുത്തിയതിനാല്‍ പ്രതിയെ വൈദ്യപരിശോധനയ്ക്ക് വിധേയനാക്കും. കേസില്‍ അന്വേഷണത്തിനായി പ്രതിയെ കസ്റ്റഡിയില്‍ വേണമെന്ന് പോലീസ് ആവശ്യപ്പെട്ടിരുന്നു.
അറസ്റ്റ് ചെയ്യുകയാണെങ്കില്‍ സ്‌റ്റേഷന്‍ ജാമ്യത്തില്‍ വിട്ടയക്കണമെന്നും മുന്‍കൂര്‍ ജാമ്യം അനുവദിച്ചുകൊണ്ടുള്ള വിധിയില്‍ കോടതി വ്യക്തമാക്കിയിരുന്നു. ഇന്നു മുതല്‍ ജൂലൈ 3 വരെ ചോദ്യം ചെയ്യാനാണ് അനുമതി. രാവിലെ 9 മണി മുതല്‍ വൈകിട്ട് 6 വരെയാണ് ചോദ്യം ചെയ്യലിനായി കോടതി സമയം അനുവദിച്ചിരിക്കുന്നത്.
ഇരയുടെ പേരു വെളിപ്പെടുത്തിയ കേസിലും വിജയ് ബാബു അന്വേഷണം നേരിടുന്നുണ്ട്. പരാതിയില്‍ നിന്ന് പിന്‍മാറാന്‍ അതിജീവിതയ്ക്ക് ഒരുകോടി രൂപ വാഗ്ദാനം ചെയ്തുവെന്ന ആരോപണവും വിജയ് ബാബുവിനെതിരെ ഉയര്‍ന്നിരുന്നു. ഇതിലും അന്വേഷണമുണ്ടാകും.
Content Highlights: Vijay Babu, Arrest, Rape Case, Kerala Police
Trending Now
