‘നയന്‍താര; ബിയോണ്ട് ദി ഫെയറി ടെയില്‍’; നയൻതാര-വിഘ്‌നേഷ് വിവാഹ ഡോക്യുമെന്ററി പ്രൊമൊ

നയൻതാരയുടെയും സംവിധായകൻ വിഘ്‌നേഷ് ശിവന്റെയും വിവാഹ ഡോക്യുമെന്ററിയുടെ പ്രൊമൊ പങ്കുവച്ച് നെറ്റ്ഫ്ളികസ്. പ്രൊമൊ വീഡിയോ എത്തിയത് നെറ്റ്ഫ്ളികസ് ഇന്ത്യ സൗത്തിന്റെ സോഷ്യൽ മീഡിയ പ്ലാറ്റ്ഫോമിലൂടെയാണ്. ഡോക്യുമെന്ററിയുടെ പേര് ‘നയൻതാര: ബിയോണ്ട് ദി ഫെയറിടെയിൽ’ എന്നാണ്. പ്രോമോ വിഡിയോയിൽ ഇരുവരും വിവാഹത്തെക്കുറിച്ചും പ്രണയത്തെക്കുറിച്ചും സംസാരിക്കുന്ന ചെറിയ ഭാഗങ്ങളും ഉണ്ട്.

ഗൗതം മേനോന്റെ സംവിധാനത്തിലാണ് നെറ്റ്ഫ്ലിക്സ് ഡോക്യുമെന്റ് ചെയ്തത്. ഒടിടി പ്ലാറ്റ്‌ഫോം വിവാഹം സംപ്രേക്ഷണം ചെയ്യുന്നതിൽ നിന്നും പിന്മാറി എന്നും വാർത്തകളുണ്ടായി. നെറ്റ്ഫ്ലിക്സ് സംപ്രേഷണ കരാർ ലംഘിച്ചുവെന്ന പേരിൽ ഇരുവർക്കും നോട്ടീസ് അയച്ചുവെന്നും മാധ്യമങ്ങൾ റിപ്പോർട്ട് ചെയ്തിരുന്നു. ഒടുവിലാണ് ഒടിടി പ്ലാറ്റ്‌ഫോം സ്ട്രീം ചെയ്യുന്നതായുള്ള സ്ഥിരീകരണം നടത്തിയത്.

നയൻ‌താരയും വിഘ്നേഷ് ശിവനും തമ്മിലുള്ള വിവാഹം നടന്നത് ജൂൺ ഒമ്പതിനായിരുന്നു. ചടങ്ങുകൾ നടന്നത് മഹാബലിപുരത്തെ റിസോ‍ർട്ടിൽ ആയിരുന്നു. നയൻസ് ചുവപ്പ് സാരിയും മരതക ആഭരണങ്ങളും അണിഞ്ഞെത്തുന്ന ചിത്രങ്ങൾ ഏറെ ഹിറ്റായിരുന്നു. വിഘ്നേഷ് ശിവൻ എത്തിയത് കസവ് മുണ്ടും കുർത്തയും ധരിച്ചാണ്. മാധ്യമങ്ങൾക്ക് വിവാഹ വേദിയിൽ പ്രവേശനമില്ലായിരുന്നു. രജനികാന്ത്, മണിരത്‌നം, ഷാരൂഖ് ഖാൻ, സൂര്യ, ജ്യോതിക തുടങ്ങിയ പ്രമുഖർ ചടങ്ങിൽ പങ്കെടുത്തിരുന്നു.

Content Highlights – Nayanthara vignesh sivan wedding promo