ചാലക്കുടിയില്‍ മിന്നല്‍ ചുഴലി; മരങ്ങളും വൈദ്യുതി പോസ്റ്റുകളും ഒടിഞ്ഞു, വീടുകള്‍ക്ക് കേടുപാടുകള്‍

ചാലക്കുടിയില്‍ മിന്നല്‍ ചുഴലിക്കാറ്റ്. പടിഞ്ഞാറേ ചാലക്കുടിയിലും മുരിങ്ങൂരിലുമാണ് മിന്നല്‍ ചുഴലി ആഞ്ഞടിച്ചത്. പുലര്‍ച്ചെ മൂന്നരയ്ക്കും നാലിനും ഇടയിലായിരുന്നു സംഭവം. ചാലക്കുടിപ്പുഴയുടെ ഇരുകരകളിലുമായി ആഞ്ഞടിച്ച കാറ്റില്‍ വ്യാപക നാശനഷ്ടമാണ് റിപ്പോര്‍ട്ട് ചെയ്യപ്പെടുന്നത്.

ശക്തമായ കാറ്റില്‍ നിരവധി വീടുകള്‍ക്ക് കേടുപാടുകള്‍ സംഭവിച്ചു. വൈദ്യുത പോസ്റ്റുകള്‍ ഒടിയുകയും നിരവധി മരങ്ങള്‍ കടപുഴകി വീഴുകയും ചെയ്തു. സെക്കന്‍ഡുകള്‍ മാത്രം നീണ്ടുനിന്ന കാറ്റിലാണ് ഇത്രയും നാശനഷ്ടങ്ങളുണ്ടായത്.

ഏതാനും വര്‍ഷങ്ങളായി ചാലക്കുടിപ്പുഴയുടെ പരിസരത്ത് ഇത്തരം മിന്നല്‍ ചുഴലികള്‍ പതിവായിരിക്കുകയാണ്. വ്യാപക നാശമാണ് ഈ ചുഴലികള്‍ വിതയ്ക്കുന്നത്.