നരബലി കണ്ടെത്തിയതില്‍ നിര്‍ണ്ണായകമായത് കടവന്ത്രയിലെ ലോട്ടറി വില്‍പനക്കാരായ സ്ത്രീകളുടെ മൊഴി

ഇലന്തൂരിലെ നരബലി കണ്ടെത്തുന്നതില്‍ പോലീസിന് നിര്‍ണ്ണായകമായത് കടവന്ത്രയിലെ ലോട്ടറി വില്‍പനക്കാരായ സ്ത്രീകളുടെ മൊഴി. കേസില്‍ അറസ്റ്റിലായ ഷാഫിയെക്കുറിച്ചുള്ള വിവരം ഇവരാണ് പോലീസിന് നല്‍കിയത്. കടവന്ത്രയില്‍ ലോട്ടറി വില്‍പനക്കാരിയായിരുന്ന പത്മത്തെ കാണാതായതുമായി ബന്ധപ്പെട്ട കേസില്‍ ഇവര്‍ നല്‍കിയ വിവരത്തിന്റെ അടിസ്ഥാനത്തിലാണ് ഷാഫിയെ കസ്റ്റഡിയില്‍ എടുത്തത്. ഷാഫിയെ ചോദ്യം ചെയ്തപ്പോഴാണ് നരബലിയെക്കുറിച്ചുള്ള വിവരങ്ങള്‍ പുറത്തു വന്നത്.

നരബലിക്കായി സ്ത്രീകളെ എത്തിക്കാന്‍ ഷാഫിയായിരുന്നു ഏജന്റായി പ്രവര്‍ത്തിച്ചത്. ലോട്ടറി വില്‍പനക്കാരായ മറ്റു സ്ത്രീകളെയും ഷാഫി സമീപിച്ചിരുന്നു. തിരുവല്ലയിലേക്ക് പോകണമെന്നു പറഞ്ഞാണ് ഇയാള്‍ സ്ത്രീകളെ സമീപിച്ചത്. പത്മത്തെ കാണാതായതോടെ മകനാണ് പോലീസില്‍ പരാതി നല്‍കിയത്. പോലീസ് നടത്തിയ അന്വേഷണത്തില്‍ പത്മത്തിന്റെ മൊബൈല്‍ ഫോണ്‍ അവസാനമായി തിരുവല്ലയിലാണ് ടവര്‍ ലൊക്കേഷന്‍ കാണിച്ചതെന്ന് കണ്ടെത്തിയിരുന്നു.

ഇക്കാര്യം പോലീസ് അറിയിച്ചതോടെയാണ് പത്മത്തിന്റെ സുഹൃത്തുക്കള്‍ക്ക് ഷാഫിയില്‍ സംശയം തോന്നിയത്. ഇവര്‍ നല്‍കിയ വിവരത്തിന്റെ അടിസ്ഥാനത്തില്‍ ഷാഫിയെ പോലീസ് ചോദ്യം ചെയ്യുകയായിരുന്നു.