നയന സൂര്യന്റെ മരണം; കാണാതായ തൊണ്ടിമുതലുകള്‍ പോലീസ് സ്‌റ്റേഷനില്‍ നിന്ന് കണ്ടെത്തി

സംവിധായിക നയന സൂര്യന്റെ മരണവുമായി ബന്ധപ്പെട്ട കേസിലെ തൊണ്ടി മുതലുകള്‍ കണ്ടെത്തി. കാണാതായ തൊണ്ടി മുതലുകള്‍ തിരുവനന്തപുരം മ്യൂസിയം പോലീസ് സ്‌റ്റേഷനില്‍ നിന്നാണ് കണ്ടെത്തിയത്. മുറിയിലുണ്ടായിരുന്ന ബെഡ്ഷീറ്റ്, തലയണ കവറുകള്‍, ചില വസ്ത്രങ്ങള്‍ എന്നിവയാണ് കാണാതായത്. ഇവ പോലീസ് സ്റ്റേഷനിലെ തൊണ്ടിമുതല്‍ സൂക്ഷിക്കുന്ന മുറിയില്‍ നിന്ന് കണ്ടെത്തുകയായിരുന്നു.

നയനയുടെ മരണത്തിനു ശേഷം ഈ തൊണ്ടി മുതലുകള്‍ മഹസര്‍ തയ്യാറാക്കി പോലീസ് കോടതിയില്‍ സമര്‍പ്പിച്ചിരുന്നതാണ്. അന്വേഷണസംഘം കോടതിയില്‍ നിന്ന് ഏറ്റുവാങ്ങിയതിനു ശേഷമാണ് ഇവ കാണാതായത്. കേസില്‍ പുനരന്വേഷണം നടത്തുന്ന ക്രൈംബ്രാഞ്ച് സംഘമാണ് ഇപ്പോള്‍ തൊണ്ടിമുതലുകള്‍ കണ്ടെത്തിയിരിക്കുന്നത്.

അന്വേഷണത്തിന്റെ ആദ്യഘട്ടമായി തൊണ്ടിമുതല്‍ കണ്ടെടുക്കാനാണ് സംഘം ശ്രമിച്ചത്. മ്യൂസിയം സ്‌റ്റേഷനില്‍ തന്നെ ഇവയുണ്ടാകുമെന്ന് സംശയമുണ്ടായിരുന്നു. തുടര്‍ന്ന് മ്യൂസിയം പോലീസിന് ഇതുസംബന്ധിച്ച കത്തുനല്‍കുകയും ഇതനുസരിച്ച് മ്യൂസിയം പോലീസ് സ്റ്റേഷനിലെ തൊണ്ടിമുതലുകള്‍ സൂക്ഷിക്കുന്ന മുറി പരിശോധിക്കുകയുമായിരുന്നു.