സംസ്ഥാന ചലച്ചിത്ര അവാർഡുകൾ പ്രഖ്യാപിച്ചു.. മമ്മൂട്ടി മികച്ച നടൻ, മികച്ച നടി വിൻസി അലോഷ്യസ്

2022 സംസ്ഥാന ചലച്ചിത്ര പുരസ്കാരങ്ങൾ പ്രഖ്യാപിച്ചു. മികച്ച നടനുള്ള പുരസ്കാരം മമ്മൂട്ടിയ്ക്കായിരിക്കുമെന്ന് സിനിമാ നിരൂപകരടക്കമുള്ളവർ നേരത്തെ തന്നെ പ്രവചിച്ചിരുന്നു.., പുഴു, നന്‍പകല്‍ നേരത്ത് മയക്കം, റോഷാക്ക്, ഭീഷ്മപര്‍വ്വം എന്നീ ചിത്രങ്ങളിലെ അഭിനയത്തിനാണ് പുരസ്‌കാരം. നവ മലയാള സിനിമയിലെ പ്രതിഭാശാലിയായ സംവിധായകൻ എന്ന് പ്രശംസിക്കപ്പെട്ട ലിജോ ജോസ് പെല്ലിശ്ശേരി- മമ്മൂട്ടി കൂട്ടുകെട്ടിൽ പിറന്ന നൻപകൽ നേരത്ത് മയക്കം മലയാളസിനിമയിലെ വേറിട്ട ഒരു ചിന്താ ആവിഷ്കാരമായിരുന്നു.മികച്ച നടിയായി തെരഞ്ഞെടുത്തത് വിൻസി അലോഷ്യസിനെയാണ് .രേഖ എന്ന ചിത്രമാണ് വിന്‍സിയെ മികച്ച നടിയാക്കിയത്. ന്നാ താൻ കേസ് കൊട് ചിത്രത്തിലെ പ്രകടനമികവിന് കുഞ്ചാക്കോ ബോബനും അപ്പൻ എന്ന ചിത്രത്തിലൂടെ അലൻസിയറും പ്രത്യേക ജൂറി പരാമർശം നേടി. നൻപകൽ നേരത്ത് മയക്കം ആണ് മികച്ച ചിത്രമായി തിരഞ്ഞെടുക്കപ്പെട്ടത്. മഹേഷ് നാരായണന്‍ മികച്ച സംവിധായകനായി.

മികച്ച ചലച്ചിത്ര ഗ്രന്ഥത്തിനുള്ള പുരസ്കാരമാണ് ആദ്യം പ്രഖ്യാപിച്ചത്. സി.എസ്.വെങ്കിടേശ്വരന്‍ പുരസ്കാരത്തിന് അർഹനായി. മികച്ച ജനപ്രിയ ചിത്രമായി ‘ന്നാ താൻ കേസ് കൊട്’ തിരഞ്ഞെടുക്കപ്പെട്ടു. ഇലവീഴാ പൂഞ്ചിറ എന്ന ചിത്രത്തിന് ഷാഹി കബീറിനെയാണ് മികച്ച നവാഗത സംവിധായകനായി തെരെഞ്ഞെടുത്തത്. തല്ലുമാല എന്ന ചിത്രത്തിന് ഷോബി പോൾ രാജ് ആണ് മികച്ച നൃത്തസംവിധായകൻ. മികച്ച പിന്നണി ഗായികയായി മൃദുല വാരിയറും മികച്ച പിന്നണി ഗായകനായി കപിൽ കപിലനും തിരഞ്ഞെടുക്കപ്പെട്ടു. ചിത്രങ്ങളുടെ എണ്ണത്തില്‍ റെക്കോർഡുമായി 154 സിനിമകളാണ് ഇത്തവണ മത്സരരംഗത്തുണ്ടായിരുന്നത്.