സ്വകാര്യബസ് തലകീഴായി മറിഞ്ഞു; 50 പേര്‍ക്കു പരിക്ക്

നിയന്ത്രണംവിട്ട സ്വകാര്യബസ് തലകീഴായി മറിഞ്ഞുണ്ടായ അപകടത്തില്‍ 50 പേർക്ക് പരിക്കേറ്റു. ഇതില്‍ മൂന്നുപേരുടെ പരിക്ക് ഗുരുതരം. തലയോലപറമ്ബ് വെട്ടിക്കാട്ടുമുക്ക് ഗുരുമന്ദിരത്തിനു സമീപം ഇന്നലെ വൈകുന്നേരം 7.15 നായിരുന്നു അപകടം.

എറണാകുളം-പാലാ-ഈരാറ്റുപേട്ട റൂട്ടില്‍ സർവീസ് നടത്തുന്ന ആവേമരിയ എന്ന സ്വകാര്യബസാണ് അപകടത്തില്‍പ്പെട്ടത്. വൈദ്യുതപോസ്റ്റിലിടിച്ച്‌ കറങ്ങിത്തിരിഞ്ഞ ബസ് താഴ്ചയിലേക്കു മറിയുകയായിരുന്നു. എറണാകുളത്തുനിന്ന് വൈക്കത്തേക്കു വരികയായിരുന്ന ബസില്‍ നിറയെ യാത്രക്കാരുണ്ടായിരുന്നു.

കൈകാലുകള്‍ക്കും തലയ്ക്കുമാണ് മിക്കവർക്കും പരിക്ക്. പരിക്കേറ്റവരെ വൈക്കം താലൂക്ക് ആശുപത്രി, മെഡിക്കല്‍ കോളജ്, മുട്ടുചിറ, പൊതി എന്നീ ആശുപത്രികളിലും പ്രവേശിപ്പിച്ചു. ബസിന്‍റെ അമിതവേഗമാണ് അപകടത്തിനു കാരണമെന്ന് നാട്ടുകാർ ആരോപിച്ചു.