പ്രതിപക്ഷം തനിക്ക് പ്രധാനമന്ത്രി പദം വാഗ്ദാനം ചെയ്തു; വെളിപ്പെടുത്തി നിതിൻ ഗഡ്കരി

ലോക്സഭ തിരഞ്ഞെടുപ്പിന് മുൻപ് പ്രതിപക്ഷത്തെ മുതിർന്ന നേതാവ് തനിക്ക് പ്രധാനമന്ത്രി പദം വാഗ്ദാനം ചെയ്തുവെന്ന വെളിപ്പെടുത്തലുമായി കേന്ദ്രമന്ത്രി നിതിൻ ഗഡ്കരി.

എന്നാല്‍ താൻ ആ വാഗ്ദാനം നിരസിച്ചുവെന്നും അത്തരം ആഗ്രഹങ്ങള്‍ തനിക്കില്ലെന്ന് വ്യക്തമാക്കിയെന്നും ഗഡ്കരി പറഞ്ഞു. നാഗ്പുരില്‍ മാധ്യമ അവാർഡ് ദാന ചടങ്ങില്‍ സംസാരിക്കുകയായിരുന്നു അദ്ദേഹം.

‘ഞാൻ ഒരു സംഭവം പറയാം, അദ്ദേഹത്തിന്റെ പേര് പറയുന്നില്ല. ഒരു നേതാവ് പറഞ്ഞു, താങ്കള്‍ പ്രധാനമന്ത്രിയാകാൻ തയ്യാറായാല്‍ ഞങ്ങള്‍ നിങ്ങളെ പിന്തുണയ്ക്കുമെന്ന്. എന്നാല്‍ നിങ്ങള്‍ എന്തിനാണ് എന്നെ പിന്തുണയ്ക്കുന്നതെന്ന് ഞാൻ തിരിച്ച്‌ ചോദിച്ചു, മാത്രമല്ല അത്തരമൊരു പിന്തുണ ഞാൻ എന്തിന് സ്വീകരിക്കണം. പ്രധാനമന്ത്രിയാകുകയെന്നതല്ല എന്റെ ജീവിത്തതിലെ സ്വപ്നം. ഞാൻ എന്റെ ബോധ്യങ്ങളോടും സംഘടനയോടും വിശ്വസ്തത പുലർത്തുന്നയാളാണ്. ഒരു പദവിക്ക് വേണ്ടിയും വിട്ടുവീഴ്ചയ്ക്ക് ഞാൻ തയ്യാറാകില്ല. കാരണം എൻ്റെ ബോധ്യങ്ങളാണ് എനിക്ക് ഏറ്റവും പ്രധാനം’, അദ്ദേഹം പറഞ്ഞു.