കൊച്ചിയിൽ പലിശക്കെണി മൂലം ഗൃഹനാഥയുടെ ആത്മഹത്യാശ്രമം: അമ്മയെ തന്റെ മുന്നിലിട്ട് തല്ലിച്ചതച്ചുവെന്ന് മകന്‍
News Desk
Posted On April 28, 2022
കൊച്ചി കടവന്ത്രയില്‍ കുടുംബശ്രീ പ്രവര്‍ത്തകയും ശുചീകരണ തൊഴിലാളിയുമായ ഗൃഹനാഥ ആത്മഹത്യക്ക് ശ്രമിച്ചു. കടവന്ത്ര ഗന്ധിനഗര്‍ ഉദയാ കോളനിയിലെ മുത്തുമാരിയാണ് വിഷം കഴിച്ച് ആത്മഹത്യക്ക് ശ്രമിച്ചത്. പലിശ തിരിച്ചടവ് സംബന്ധിച്ച പ്രശ്‌നത്തെ തുടര്‍ന്നാണ് മുത്തുമാരി ആത്മഹത്യക്ക് ശ്രമിച്ചത്.
പലിശയ്ക്ക് പണം നൽകുന്ന സ്ത്രീയുടെ പീഡനം സഹിക്കവയ്യാതെയാണ് ആത്മഹത്യാശ്രമം എന്ന് ബന്ധുക്കള്‍ ആരോപിച്ചു. പലിശ തിരിച്ചടവ് മുടങ്ങിയതിനെ തുടര്‍ന്ന് പലിശ നല്‍കിയ സുധ എന്ന് യുവതി ഭീഷണിപ്പെടുത്തിയിരുന്നതായും വീട്ടില്‍ വെച്ച് മര്‍ദ്ദിച്ചതായും മുത്തുമാരിയുടെ ബന്ധുക്കൾ പറയുന്നു. തന്റെ മുന്നിലിട്ട് അമ്മയെ പലിശയ്ക്ക് പണം നൽകുന്ന സുധ എന്ന സ്ത്രീ തല്ലിച്ചതച്ചിട്ടുണ്ടെന്ന് മുത്തുമാരിയുടെ മകന്‍ സാര്‍ക്ക് ലൈവിനോട് പറഞ്ഞു.
മുത്തുമാരിയുടെ സഹോദരി പറയുന്നത്
സുധയില്‍ നിന്ന് 2 ലക്ഷം രൂപ മുത്തുമാരി കടമായി വാങ്ങിയിരുന്നുവെന്നും ഇതില്‍ ഒരു ലക്ഷം രുപ മുത്തുമാരി തിരികെ നല്‍കിയെന്നും മുത്തുമാരിയുടെ സഹോദരി പറയുന്നു. എന്നാല്‍ മറ്റൊരു ആവിശ്യത്തിന് സുധയുടെ പക്കല്‍ മുത്തുമാരി വീണ്ടും പലിശയ്ക്ക് പണം ചോദിച്ചു. പലിശയ്ക്ക് നല്‍കാന്‍ പണം ഇല്ലായിരുന്ന സുധ തന്റെ സ്വര്‍ണമാല മുത്തുമാരിക്ക് നല്‍കി. മാല പണയപ്പെടുത്തി ആവിശ്യത്തിന് പണം എടുത്ത ശേഷം ഒരാഴ്ച്ച കഴിഞ്ഞ് മാല തിരികെ നല്‍കിയാല്‍ മതി എന്ന് സുധ പറഞ്ഞു.
എന്നാൽ ഒരാഴ്ച്ച കഴിഞ്ഞ് മാല തിരികെ നല്‍കാന്‍ മുത്തുമാരിക്ക് സാധിച്ചില്ല. മാല തിരികെ നല്‍കുന്നതിനായി സാവകാശം ചോദിക്കാന്‍ ചെന്ന മുത്തുമാരിയെ സുധ മര്‍ദ്ദിച്ചതായി ബന്ധുക്കള്‍ ആരോപിക്കുന്നു. താന്‍ കൂടെയുള്ളപ്പോഴാണ് അമ്മയെ സുധ മര്‍ദ്ദിച്ചതെന്ന് മുത്തുമാരിയുടെ മകന്‍ പറഞ്ഞു.
താന്‍ നിരപരാധിയെന്ന് സുധ
എന്നാല്‍ താന്‍ ആരേയും മര്‍ദ്ദിച്ചിട്ടില്ലെന്നും തന്നെ കുടുക്കാനായാണ് ഈ ആരോപണങ്ങള്‍ എന്നും സുധ സാര്‍ക്ക് ലൈവിനോട് പറഞ്ഞു. മാല നല്‍കാന്‍ സാവകാശം വേണമെന്ന് മുത്തുമാരി പറഞ്ഞപ്പോള്‍ മനപ്രയാസം കാരണം താന്‍ മുത്തുമാരിയെ അസഭ്യം പറഞ്ഞു. എന്നാല്‍ മുത്തുമാരിയെ മര്‍ദ്ദിച്ചു എന്ന് പറയുന്ന സമയത്ത് താന്‍ വീട്ടില്‍ പോലും ഇല്ലായിരുന്നു എന്ന് സുധ പറഞ്ഞു.
പണയം വെച്ച മാല തിരികെ എടുത്ത് നല്‍കാന്‍ പണം തന്ന് സഹായിക്കണമെന്നും പണം തിരികെ നല്‍കാമെന്നും മുത്തുമാരി സുധയോട് ഫോണില്‍ പറഞ്ഞെന്ന് സുധ പറയുന്നു. മാല ചോദിച്ച് വീട്ടിലെത്തിയാല്‍ താന്‍ ആത്മഹത്യ ചെയ്യുമെന്നും മുത്തുമാരി പറഞ്ഞു. ആത്മഹത്യാ ഭീഷണിക്ക് വഴങ്ങാതെ സുധ മുത്തുമാരിയുടെ വീട്ടിലെത്തിയപ്പോഴേക്കും മുത്തുമാരി വിഷം കഴിച്ച് ആത്മഹത്യക്ക് ശ്രമിച്ചിരുന്നു. വിഷം കഴിച്ച വിവരം വീട്ടുകാരോട് പറഞ്ഞതോടെ മുത്തുമാരിയെ ആശുപത്രിയിലേക്ക് കോണ്ടുപോയി.
ആത്മഹത്യക്ക് ശ്രമിച്ച മുത്തുമാരിയെ കടവന്ത്ര സഹകരണാശുപത്രിയില്‍ പ്രവേശിപ്പിച്ചിരിക്കുകയാണ്. അപകട നില തരണം ചെയ്തതായി ബന്ധുക്കള്‍ അറിയിച്ചു.
Content Highlight: Illegal money lender’s harassment- Woman attempts suicide in Kochi.
Trending Now
കേരളത്തിന് സമീപം ചക്രവാത ചുഴി; മഴ ശക്തമാകും
You may also like
