താമരശ്ശേരി സംഘർഷത്തിന് പിന്നിലുള്ളത് SDPI; ഡിവൈഎഫ്‌ഐ നേതാവ് ശ്രമിച്ചത് സംഘർഷം ഒഴിവാക്കാനെന്നും സിപിഎം ജില്ലാ സെക്രട്ടറി

താമരശ്ശേരിയിലെ ഫ്രഷ്‌കട്ട് സമരത്തിന് നേതൃത്വം നൽകിയത് എസ്ഡിപിഐ ആണെന്ന് സിപിഎം ജില്ലാ സെക്രട്ടറി എം മെഹബൂബ്. സമരത്തിലേക്കുള്ള എസ്ഡിപിഐ നുഴഞ്ഞുകയറ്റം അന്വേഷിക്കണമെന്നും കേസിൽ പ്രതിചേർക്കപ്പെട്ട ഡിവൈഎഫ്‌ഐ നേതാവ് സംഘർഷം ഒഴിവാക്കാനാണ് ശ്രമിച്ചതെന്നും എം മെഹബൂബ് പറഞ്ഞു.

സംഭവം വളരെ കൃത്യമായ ഒരു ഗൂഢാലോചനയുടെ ഭാഗമാണ്. സമരത്തെ എസ്ഡിപിഐയും പ്രദേശത്തെ നാലോളം പ്രാദേശിക ലീഗ് നേതാക്കളുമാണ് നയിച്ചത്. സമരത്തിന് വേറെ രാഷ്ട്രീയമുഖമൊന്നും നൽകിയിട്ടില്ല. സിപിഎം അനുഭാവികളായ കുടുംബങ്ങളും ഇതിന്റെ പ്രയാസം അനുഭവിക്കുന്നുണ്ട്. ഈ പ്രശ്‌നം പരിഹരിക്കണമെന്നതാണ് പാർട്ടിയുടെയും സമീപനം. എന്നാൽ ക്രിമിനൽ സ്വഭാവമുള്ള ചിലരാണ് ഈ പ്രവർത്തി നടത്തിയത്. സമഗ്ര അന്വേഷണം നടത്തി യഥാർത്ഥ കുറ്റവാളികളെ നിയമത്തിന് മുന്നിൽ കൊണ്ടുവരണമെന്നും മെഹബൂബ് പറഞ്ഞു.