ലൈംഗിക അധിക്ഷേപം ;കോളജിനെതിരെ ഗുരുതര ആരോപണവുമായി നഴ്‌സിങ് വിദ്യാര്‍ത്ഥിനികൾ

ചേര്‍ത്തല എസ് എച്ച് നഴ്‌സിംഗ് കോളജിനെതിരെ ഗുരുതര ആരോപണവുമായി നഴ്‌സിങ് വിദ്യാര്‍ത്ഥിനികള്‍ രംഗത്തെത്തി. കോളജ് വൈസ് പ്രിന്‍സിപ്പല്‍ ലൈംഗിക അധിക്ഷേപം നടത്തിയെന്ന് വിദ്യാര്‍ത്ഥിനികള്‍ പരാതിയില്‍ പറയുന്നു.

നഴ്‌സിങ് കൗണ്‍സിലിനാണ് വിദ്യാര്‍ത്ഥികള്‍ പരാതി നല്‍കിയത്. ഒരുമിച്ച് നടക്കുന്നവരെ സ്വവര്‍ഗാനുരാഗികളെന്ന് വിളിക്കുകയും യൂണിഫോമിലെ ചുളിവിനെ പോലും ലൈംഗികമായി വ്യാഖ്യാനിക്കുകയും ചെയ്‌തെന്നും വിദ്യാര്‍ത്ഥികള്‍ പറയുന്നു.

വിദ്യാര്‍ത്ഥികളെ നിര്‍ബന്ധിച്ച് ഡോക്ടര്‍മാരുടെ ചെരുപ്പും ആശുപത്രിയിലെ ടോയ്‌ലറ്റുൾപ്പെട വൃത്തിയാക്കിപ്പിക്കാറുണ്ടെന്നും പരാതിയിലുണ്ട്.ഇവിടുത്തെ ഹോസ്റ്റല്‍ ജയിലിന് സമാനമാണെന്നാണ് അന്തേവാസികൾ പറയുന്നത്.

വിദ്യാര്‍ത്ഥികളെ പുറത്തേക്കോ വീട്ടിലേക്കോ വിടില്ലെന്നും മാതാപിതാക്കളെ കാണാന്‍പോലും പരിമിതമായ സമയം മാത്രമാണ് നല്‍കുന്നതെന്നും ആക്ഷേപമുണ്ട്. ഹോസ്റ്റല്‍ ഭക്ഷണം മോശമായതിനാല്‍ വിദ്യാര്‍ത്ഥികളില്‍ പലരും കഴിക്കാറില്ല. ക്രിസ്ത്യാനികളല്ലാത്ത വിദ്യാര്‍ത്ഥികളും പള്ളിയില്‍ പോകണമെന്നും ഇല്ലെങ്കില്‍ ശിക്ഷ നല്‍കുന്ന രീതിഉണ്ടെന്നും വിദ്യാർഥികളുടെ പരാതിയിൽ ഉണ്ട്.

Content Highlight – Nursing students with serious allegations of sexual harassment against college