യുഡിഎഫ് സ്ഥാനാർത്ഥി ഉമ തോമസ് ശിവഗിരിയിൽ; സ്വാമി സച്ചിദാനന്ദയുമായി കൂടിക്കാഴ്ച

വര്‍ക്കല ശിവഗിരി മഠം സന്ദര്‍ശിച്ച് തൃക്കാക്കരയിലെ യുഡിഎഫ് സ്ഥാനാര്‍ത്ഥി ഉമ തോമസ്. ഇന്ന് പുലര്‍ച്ചെയാണ് ഉമ തോമസ് ശിവഗിരി മഠത്തില്‍ എത്തിയത്. തെരെഞ്ഞെടുപ്പിൽ മഠത്തിന്റെ പിന്തുണ അഭ്യർത്ഥിക്കുന്നതിനാണ് സന്ദർശനം.

ധര്‍മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദയുടെ നേതൃത്വത്തിൽ സന്യാസിമാർ ഉമ തോമസിനെ സ്വീകരിച്ചു. ഉപതെരഞ്ഞെടുപ്പിന്റെ പ്രചാരണം നിര്‍ണായക ഘട്ടത്തിലേക്ക് കടക്കുമ്പോഴാണ് ഉമ തോമസിന്റെ ശിവഗിരി സന്ദര്‍ശനം.

നേരത്തെ എസ് എന്‍ ഡി പി ജനറല്‍ സെക്രട്ടറി വെള്ളാപ്പള്ളി നടേശനെ ഫോണില്‍ വിളിച്ചും പെരുന്നയിലെ എന്‍ എസ് എസ് ആസ്ഥാനത്ത് നേരിട്ടെത്തിയും ഉമ തോമസ് പിന്തുണ തേടിയിരുന്നു. സമാന രീതിയില്‍ എല്‍ഡിഎഫ് സ്ഥാനാര്‍ത്ഥി ഡോ. ജോ ജോസഫും മത – സാമുദായിക നേതാക്കളുടെ പിന്തുണ ഉറപ്പാക്കിയിരുന്നു.

തൃക്കാക്കര ഉപതെരഞ്ഞെടുപ്പ് പ്രചാരണം രണ്ടാം ഘട്ടത്തിലേക്ക് കടക്കുകയാണ്. എല്‍ഡിഎഫ് സ്ഥാനാര്‍ത്ഥി ഡോ. ജോ ജോസഫിന്റെ വാഹന പ്രചാരണം ഇന്ന് മുന്നണി കണ്‍വീനര്‍ ഇ പി ജയരാജന്‍ ഉദ്ഘാടനം ചെയ്യും. യുഡിഎഫ് സ്ഥാനാര്‍ത്ഥി ഉമ തോമസിന്റെ ഇന്നത്തെ പ്രചാരണം കെ സുധാകരനാണ് ഉദ്ഘാടനം ചെയ്യുന്നത്. എന്‍ഡിഎയുടെ തെരെഞ്ഞെടുപ്പ് ഓഫീസ് ഇന്ന് പ്രവര്‍ത്തനം തുടങ്ങും. പി കെ കൃഷ്ണദാസ് ആണ് ഉദ്ഘാടനം ചെയ്യുക.

Content Highlight: UDF candidate Uma Thomas visits Varkala Shivagiri Temple.