വിജയ് ബാബുവിന്റെ മടക്കയാത്രയില്‍ അവ്യക്തത; ഇന്ന് കൊച്ചിയില്‍ എത്തില്ല

വിജയ് ബാബു നാട്ടിലെത്തുന്നതില്‍ അവ്യക്തത തുടരുന്നു. ഇന്ന് ദുബായില്‍ നിന്ന് കൊച്ചിയിലേക്ക് മടങ്ങുന്ന യാത്രക്കാരുടെ പട്ടികയില്‍ വിജയ് ബാബുവിന്റെ പേരില്ല. വിജയ് ബാബുവിന്റെ മടക്കയാത്രക്കുള്ള ടിക്കറ്റ് ഹാജരാക്കിയശേഷം മുന്‍കൂര്‍ ജാമ്യഹര്‍ജി പരിഗണിക്കാമെന്ന് ഹൈക്കോടതി കഴിഞ്ഞദിവസം പറഞ്ഞിരുന്നു. നടിയെ ബലാത്സംഗം ചെയ്ത കേസില്‍ പ്രതിയായതിനെ തുടര്‍ന്ന് വിജയ് ബാബു രാജ്യം വിടുകയായിരുന്നു.

ഹൈക്കോടതി പരാമര്‍ശത്തിന്റെ പശ്ചാത്തലത്തില്‍ യാത്രാരേഖകള്‍ ഇന്നോ നാളെയോ കോടതിയില്‍ ഹാജരാക്കുമെന്ന് നടന്റെ അഭിഭാഷകന്‍ പറഞ്ഞതായി മനോരമ ന്യൂസ് റിപ്പോര്‍ട്ട് ചെയ്തു. അതേസമയം വിജയ് ബാബുവിനെതിരെ റെഡ് കോര്‍ണര്‍ നോട്ടീസ് പുറപ്പെടുവിക്കാനുള്ള നീക്കത്തിലാണ് പൊലീസ്. ലുക്കൗട്ട് നോട്ടീസ് നിലനില്‍ക്കുന്നതിനാല്‍ വിജയ് ബാബു രാജ്യത്ത് തിരിച്ചെത്തിയാലും എമിഗ്രേഷന്‍ വിഭാഗം തടഞ്ഞുവെച്ച് അറസ്റ്റ് ചെയ്യും.

അറസ്റ്റ് ഒഴിവാക്കാനായി മുന്‍കൂര്‍ ജാമ്യത്തിനായി ഹൈക്കോടതിയെ സമീപിച്ചപ്പോളാണ് യാത്രാരേഖകള്‍ ഹാജരാക്കാന്‍ കോടതി ആവശ്യപ്പെട്ടത്. യാത്രാ രേഖകള്‍ പരമാവധി വേഗത്തില്‍ ഹാജരാക്കി ഹര്‍ജി വ്യാഴാഴ്ച കോടതിക്ക് മുന്‍പാകെ കൊണ്ടുവരാനാണ് നീക്കം. പ്രതിയുടെ പാസ്പോര്‍ട്ട് റദ്ദാക്കിയതിനാല്‍ പ്രത്യേക യാത്രാരേഖകള്‍ തയാറാക്കി നാട്ടിലെത്തിക്കാനുള്ള ശ്രമങ്ങള്‍ തുടങ്ങുമെന്ന് പൊലീസ് വ്യക്തമാക്കിയെങ്കിലും ഇതിനുള്ള നടപടിക്രമങ്ങള്‍ പൂര്‍ത്തിയാക്കിയിട്ടില്ല.

Content Highlight: Vijay Babu not expected to return from Dubai today.