മദ്യലഹരിയില്‍ അലക്ഷ്യമായി വാഹനമോടിച്ച് അപകടം; ആംആദ്മി സംസ്ഥാന അദ്ധ്യക്ഷനെതിരെ കേസെടുത്തു

മദ്യലഹരിയിൽ അലക്ഷ്യമായി വാഹനമോടിച്ച് അപകടമുണ്ടാക്കിയ ആം ആദ്മി നേതാവിനെതിരെ കേസെടുത്തു. സംസ്ഥാന പ്രസിഡന്റ് അഡ്വ. വിനോദ് മാത്യു വിൽസണെതിരെയാണ് കേസെടുത്തത്. ഇന്നലെ രാത്രി കൊല്ലം കാങ്കത്തുമുക്കിലായിരുന്നു അപകടം. വിനോദ് മാത്യു സഞ്ചരിച്ച വാഹനം ഒരു സിഗ്നൽ പോസ്റ്റിലേക്ക് ഇടിച്ചുകയറുകയായിരുന്നു. ഇയാളെ നാട്ടുകാർ പൊലീസിനെ ഏൽപ്പിക്കുകയായിരുന്നു.

വൈദ്യപരിശോധനയിൽ വിനോദ് മദ്യപിച്ചതായി കണ്ടെത്തിയിരുന്നു. ഒപ്പമുണ്ടായിരുന്ന സുഹൃത്തുമായി വഴക്കിട്ടതിനെ തുടർന്നാണ് വാഹനത്തിന്റെ നിയന്ത്രണം നഷ്ടമായതെന്ന് പൊലീസ് പറയുന്നു. കൊല്ലം വെസ്റ്റ്‌ പൊലീസ് ഇയാളെ സ്റ്റേഷൻ ജാമ്യത്തിൽ വിട്ടയച്ചു.