ഗെയ്മി ചുഴലിക്കാറ്റ് ; ടാൻസാനിയൻ ചരക്ക് കപ്പല്‍ മുങ്ങിയതായി റിപ്പോര്‍ട്ട്, 9 നാവികരെ കാണാതായി
National Desk
Posted On July 26, 2024
തായ്‌വാന്റെ തെക്കൻ തീരത്ത് വീശിയടിച്ച്‌ കൊടുങ്കാറ്റില്‍പ്പെട്ട് ടാൻസാനിയൻ ചരക്ക് കപ്പല്‍ മുങ്ങിയതായി റിപ്പോർട്ട്. കപ്പല്‍ മുങ്ങുന്നതിനിടെ ലൈഫ് ജാക്കറ്റുകളില്‍ കടലിലേക്ക് ചാടിയ ഒമ്ബത് മ്യാൻമർ നാവികരെ കാണാതായതായി അധികൃതർ അറിയിച്ചു.
ഗെയ്മി ചുഴലിക്കാറ്റിന്റെ പശ്ചാത്തലത്തില്‍ കൊടുങ്കാറ്റുള്ള കാലാവസ്ഥ നാവികരുടെ അടുത്തേക്ക് രക്ഷാപ്രവർത്തകരെ എത്തുന്നതില്‍ നിന്ന് തടഞ്ഞുവെന്ന് തായ്‌വാനിലെ നാഷണല്‍ ഫയർ ഏജൻസി തലവൻ ഹ്‌സിയാവോ ഹുവാൻ-ചാങ് ഒരു ബ്രീഫിംഗില്‍ പറഞ്ഞു.
എട്ട് വർഷത്തിനിടെ തായ്‌വാനില്‍ വീശുന്ന ഏറ്റവും ശക്തമായ കൊടുങ്കാറ്റായ ഗെയ്മി, ഇന്നലെ രാത്രി 10 മണിയോടെ (1400 ജിഎംടി) വടക്കുകിഴക്കൻ തായ്‌വാനില്‍ കരതൊട്ടു. തായ്‌വാനില്‍ വീശിയടിക്കുന്ന ഈ വർഷത്തെ ആദ്യത്തെ ചുഴലിക്കാറ്റാണ് ഗെയ്മി. ടാൻസാനിയയുടെ പതാക ഘടിപ്പിച്ച കപ്പല്‍ എപ്പോഴാണ് മുങ്ങിയതെന്ന് വ്യക്തമാക്കിയിട്ടില്ല. മണിക്കൂറില്‍ 190 കിലോമീറ്റർ (118 മൈല്‍) വേഗതയില്‍ കാറ്റ് വീശിയടിച്ച ഗെയ്മി ചുഴലിക്കാറ്റ് ബുധനാഴ്ച രാത്രി തായ്‌വാനില്‍ കരകയറിയതിന് പിന്നാലെയാണ് കപ്പല്‍ മുങ്ങിയ വാർത്ത വന്നത്.
Trending Now
