ചിത്രം റിലീസ് ചെയ്ത് മണിക്കൂറുകള്‍ക്കുളളില്‍ ചോര്‍ത്തി, കങ്കുവയുടെ ഹൈ ക്വാളിറ്റി വ്യാജപതിപ്പ് പ്രചരിക്കുന്നതായി പരാതി

സൂര്യ നായകനായ പുതിയ ചിത്രം കങ്കുവയുടെ വ്യാജ പതിപ്പ് പ്രചരിക്കുന്നതായി പരാതി. ചിത്രം തീയേറ്ററുകളിലെത്തി മണിക്കൂറുകള്‍ക്കകമാണ് വ്യത്യസ്ത ക്വാളിറ്റിയിലുളള പതിപ്പുകള്‍ പുറത്തിറങ്ങിയിരിക്കുന്നത്.

ഇത് കങ്കുവയുടെ അണിയറപ്രവർത്തകരെ ഞെട്ടിച്ചിരിക്കുകയാണ്. സംഭവത്തില്‍ ചിത്രത്തിന്റെ നിർമാതാക്കളായ സ്റ്റുഡിയോ ഗ്രീൻ മുന്നറിയിപ്പുമായി രംഗത്തെത്തിയിട്ടുണ്ട്. ചിത്രം തീയേറ്ററുകളില്‍ നിന്ന് ചോർത്തിയവർക്കെതിരെ കർശന നടപടിയെടുക്കുമെന്നും നിർമാതാക്കള്‍ വ്യക്തമാക്കി.

തമിള്‍റോക്കേഴ്സ്, ടെലിഗ്രാം പോലുള്ള ടോറന്റ് പ്ലാറ്റ്ഫോമുകളില്‍ കങ്കുവയുടെ വ്യാജ പതിപ്പ് പ്രചരിക്കുന്നുവെന്ന് കണ്ടെത്തിയിട്ടുണ്ട്. 1080പി മുതല്‍ 240പിവരെ ക്വാളിറ്റിയിലാണ് ചിത്രത്തിന്റെ വ്യാജപതിപ്പ് പ്രചരിക്കുന്നത്. ഇത്തരം പ്ലാറ്റ്ഫോമുകള്‍ ഉപയോഗിക്കുന്നവർക്ക് എളുപ്പം തിരഞ്ഞ് ഫയല്‍ ഡൗണ്‍ലോഡ് ചെയ്യാവുന്ന വിധത്തിലാണ് ഇതുമായി ബന്ധപ്പെട്ട സേർച്ച്‌ വേഡുകളും തയ്യാറാക്കിയിരിക്കുന്നത്. കൂടാതെ മറ്റുചില ഓണ്‍ലൈൻ പ്ലാറ്റ്ഫോമുകളിലും കങ്കുവയുടെ വ്യാജപതിപ്പ് ലഭ്യമാണ്.

ശിവ സംവിധാനം ചെയ്ത ബിഗ് ബജറ്റ് ചിത്രം നവംബർ 14നാണ് റിലീസ് ചെയ്തത്.