സംസ്ഥാന സ്‌കൂള്‍ കലോത്സവം; കോല്‍ക്കളി മത്സരത്തിനിടെ കാര്‍പെറ്റില്‍ തടഞ്ഞു വീണ് വിദ്യാര്‍ത്ഥിക്ക് പരിക്ക്

കോല്‍ക്കളി മത്സരത്തിനിടെ സ്‌റ്റേജിലെ കാര്‍പെറ്റില്‍ തടഞ്ഞു വീണ് മത്സരാര്‍ത്ഥിക്ക് പരിക്ക്. എറണാകുളം ജില്ലയെ പ്രതിനിധാനം ചെയ്തെത്തിയ തണ്ടേക്കാട് ജമാ അത്ത് എച്ച്.എസ്.എസിലെ ഒന്‍പതാം ക്ലാസ് വിദ്യാര്‍ഥി സൂഫിയാനാണ് കൈയ്ക്ക് പരിക്കേറ്റത്. അഞ്ചാം നമ്പര്‍ വേദിയായ ബീച്ചിലെ ഗുജറാത്തി സ്‌കൂളിലെ ഹാളിലാണ് സംഭവം.

മത്സരം തുടങ്ങുന്നതിനു മുന്‍പായി കാര്‍പെറ്റിനെക്കുറിച്ച് കുട്ടികള്‍ പരാതി പറഞ്ഞിരുന്നു. എന്നാല്‍ സെല്ലോ ടേപ്പ് ഒട്ടിച്ച് താല്‍ക്കാലിക പരിഹാരം കാണുകയായിരുന്നു അധികൃതര്‍. അപകടത്തിനു പിന്നാലെ പ്രതിഷേധം ഉയര്‍ന്നതിനെത്തുടര്‍ന്ന് മത്സരം നിര്‍ത്തി വെച്ചു.