പാകിസ്‌ഥാനില്‍ നിന്ന് മയക്കുമരുന്നുമായി ചൈനീസ് ഡ്രോണ്‍; വെടിവച്ച്‌ വീഴ്‌ത്തി ഇന്ത്യൻ സേന

മയക്കുമരുന്ന് കടത്തിനായി ഉപയോഗിച്ച ചൈനീസ് നിര്‍മിത ഡ്രോണ്‍ വെടിവച്ച്‌ വീഴ്‌ത്തി ഇന്ത്യൻ സുരക്ഷാ സേന. പാകിസ്ഥാൻ അതിര്‍ത്തിയില്‍ നിന്നാണ് മയക്കുമരുന്നുമായി ഡ്രോണ്‍ എത്തിയത്. പഞ്ചാബ് അതിര്‍ത്തിയില്‍ വച്ചാണ് വെടിവച്ച്‌ വീഴ്‌ത്തിയതെന്ന് സേനാവൃത്തങ്ങള്‍ വ്യക്തമാക്കി. ഇന്നലെ രാത്രിയായിരുന്നു സംഭവം.

ഡ്രോണില്‍ ഉണ്ടായിരുന്ന 523 ഗ്രാം ഹെറോയിൻ സുരക്ഷാ സേന പിടിച്ചെടുത്തു. പ‌ഞ്ചാബിലെ ടാൻ താരൻ ഗ്രാമത്തിലെ മാരി കാംബോക്കെ എന്ന സ്ഥലത്തുള്ള കൃഷിയിടത്തിലാണ് ഡ്രോണ്‍ വെടിവച്ച്‌ വീഴ്‌ത്തിയത്.

ഇതില്‍ ടേപ്പില്‍ പൊതിഞ്ഞ നിലയിലായിരുന്നു മയക്കുമരുന്ന്. ഡിജെഐ മാവിക്3 ക്ളാസിക് മോഡല്‍ ക്വാഡ്‌കോപ്‌ടര്‍ ആണ് പിടിച്ചെടുത്തത്. ഇത് ചൈനീസ് നിര്‍മിതമാണെന്നും റിപ്പോര്‍ട്ടില്‍ പറയുന്നു.