ചരിത്ര നേട്ടത്തില്‍ ആടുജീവിതം; ആദ്യദിനം സ്വന്തമാക്കിയത് വമ്ബൻ കലക്ഷൻ

തിയറ്ററുകളില്‍ തരംഗം തീർക്കുകയാണ് ബ്ലസ്സിയുടെ സംവിധാനത്തില്‍ പൃഥ്വിരാജിനെ നായകനാക്കി ഒരുക്കിയ ആടുജീവിതം. ബെന്യാമിന്റെ ഇതേ പേരിലുള്ള നോവലിന്റെ ദൃശ്യാവിഷ്‍കാരം വ്യാഴാഴ്ച പുറത്തുവന്ന ശേഷം മികച്ച റിപ്പോർട്ടുകളാണ് ലഭിക്കുന്നത്.

ആദ്യദിനം തന്നെ ഇന്ത്യൻ ബോക്സോഫിസില്‍നിന്ന് 7.45 കോടി ചിത്രം സ്വന്തമാക്കിയെന്നാണ് പ്രാഥമിക റിപ്പോർട്ടുകള്‍. ചിത്രത്തിന്റെ മലയാളം പതിപ്പ് മാത്രം 6.50 കോടി നേടി. കന്നഡ, തമിഴ്, തെലുങ്ക്, ഹിന്ദി പതിപ്പുകളില്‍നിന്ന് ഒരു കോടി രൂപയും ആദ്യദിനം സ്വന്തമാക്കി. മലയാളത്തില്‍ റിലീസ് ദിനം ഏറ്റവും കൂടുതല്‍ പണം വാരുന്ന ചിത്രങ്ങളിലൊന്നായി മാറിയ ആടുജീവിതം ഈ വര്‍ഷം ആദ്യദിനം ഏറ്റവും കൂടുതല്‍ കലക്ഷന്‍ നേടുന്ന ചിത്രവുമായി.

കഴിഞ്ഞ 24 മണിക്കൂറില്‍ ബുക്ക് മൈ ഷോ വഴി ചിത്രത്തിന്‍റെ 2.9 ലക്ഷം ടിക്കറ്റുകള്‍ വിറ്റുപോയെന്നാണ് റിപ്പോർട്ട്. വെള്ളിയാഴ്ച രാവിലെ ഓരോ മണിക്കൂറിലും 17000 ടിക്കറ്റിനടുത്താണ് ബുക്ക് മൈ ഷോയിലൂടെ വിറ്റുപോയത്.