ബസ് ടെമ്ബോയുമായി കൂട്ടിയിടിച്ച്‌ 12 മരണം; മരിച്ചവരില്‍ എട്ടുപേരും കുട്ടികള്‍

രാജസ്ഥാനില്‍ ബസ് അപകടത്തില്‍ 12 മരണം. ഇന്നലെ രാത്രി പതിനൊന്ന് മണിയോടെ ദോല്‍പൂരിന് സമീപം സുനിപൂർ ദേശീയ ഹൈവേയിലാണ് അപകടമുണ്ടായത്.

സ്ളീപ്പർ കോച്ച്‌ ബസ് ടെമ്ബോ വാനുമായി കൂട്ടിയിടിക്കുകയായിരുന്നു. മരണപ്പെട്ടവരില്‍ എട്ട് കുട്ടികളും ഉള്‍പ്പെടുന്നു. ബരോലി ഗ്രാമത്തിലെ ഒരു വിവാഹച്ചടങ്ങില്‍ പങ്കെടുത്ത് മടങ്ങിയവരാണ് ടെമ്ബോയിലുണ്ടായിരുന്നത്. മരിച്ചവരില്‍ അഞ്ച് ആണ്‍കുട്ടികളും മൂന്ന് പെണ്‍കുട്ടികളും രണ്ട് സ്ത്രീകളും ഒരു പുരുഷനും ഉള്‍പ്പെടുന്നു. ബാദി നഗരവാസികളാണ് മരണപ്പെട്ടവരെന്നാണ് റിപ്പോർട്ട്.

അപകടസമയത്ത് പ്രദേശത്തുണ്ടായിരുന്നവർ പൊലീസിനെ വിവരമറിയിക്കുകയായിരുന്നു. പൊലീസെത്തിയാണ് അപകടത്തില്‍ പരിക്കേറ്റവരെ ആശുപത്രിയിലെത്തിച്ചത്. പരിക്കേറ്റവരില്‍ നാലുപേരുടെ നില ഗുരുതരമാണ്. മരണപ്പെട്ടവരുടെ മൃതദേഹങ്ങള്‍ ബാരി ആശുപത്രി മോർച്ചറിയില്‍ സൂക്ഷിച്ചിരിക്കുകയാണ്.