മുഖ്യമന്ത്രിയുടെ പൊലീസ് മെഡൽ പ്രഖ്യാപനം മുടങ്ങി; ആഭ്യന്തര വകുപ്പിൽ ഗുരുതര വീഴ്ച

സ്വാതന്ത്ര്യദിനത്തിന്റെ തലേദിവസം പതിവായി പ്രഖ്യാപിക്കാറുള്ള മുഖ്യമന്ത്രിയുടെ പൊലീസ് മെഡലുകൾ ഇത്തവണ പ്രഖ്യാപിച്ചില്ല. മെഡലിന് അർഹരായവരുടെ പട്ടികയിൽ കൃത്യസമയത്ത് പരിശോധന പൂർത്തിയാക്കാത്തതാണ് പ്രഖ്യാപനം മുടങ്ങാൻ കാരണം. സംഭവത്തിൽ ആഭ്യന്തര വകുപ്പിലെ ഉദ്യോഗസ്ഥർക്ക് ഗുരുതര വീഴ്ച സംഭവിച്ചതായാണ് സൂചന.

മാർച്ച് മാസത്തിൽ പൊലീസ് ആസ്ഥാനത്തുനിന്ന് മെഡലുകൾക്ക് അർഹരായ ഉദ്യോഗസ്ഥരുടെ ശുപാർശ പട്ടിക ആഭ്യന്തര വകുപ്പിന് കൈമാറിയിരുന്നു. എന്നാൽ സമയബന്ധിതമായി പട്ടികയിലെ വിവരങ്ങൾ പരിശോധിച്ച് നടപടി പൂർത്തിയാക്കാൻ ഉദ്യോഗസ്ഥർക്ക് സാധിച്ചില്ല. പട്ടികയുമായി ബന്ധപ്പെട്ട് പരാതികൾ ഉയർന്നതിനെ തുടർന്ന് ഇത് തിരിച്ചയച്ചെങ്കിലും പിന്നീട് തുടർനടപടികളൊന്നും സ്വീകരിച്ചില്ലെന്നാണ് പുറത്തുവരുന്ന വിവരങ്ങൾ. പട്ടിക അന്തിമമായി പരിശോധിച്ച് അംഗീകാരം നൽകുന്നതിനായി ആഭ്യന്തര സെക്രട്ടറിയുടെ നേതൃത്വത്തിലുള്ള യോഗം ഓഗസ്റ്റ് 20-നാണ് ചേരുന്നത്.