ധര്‍മ്മയും ചാര്‍ളിയും ഉടന്‍ തിയറ്ററില്‍; ‘777 ചാര്‍ളിയുടെ’ ട്രെയിലര്‍ പുറത്തിറക്കി

കന്നട സൂപ്പര്‍ താരം രക്ഷിത് ഷെട്ടി നായകനായ ‘777 ചാര്‍ളി’ യുടെ ഒഫീഷ്യല്‍ ട്രെയിലര്‍ പുറത്തിറക്കി അണിയറ പ്രവര്‍ത്തകര്‍. മണിക്കൂറുകള്‍ക്കുള്ളില്‍ തന്നെ സമൂഹമാധ്യമങ്ങളില്‍ വൈറലാവുകയാണ് വീഡിയോ. താരങ്ങളായ നിവില്‍ പോളി, ടൊവിനോ തോമസ്, ആസിഫ് അലി, ആന്റണി വര്‍ഗ്ഗീസ് എന്നിവരുടെ സോഷ്യല്‍ മീഡിയ വഴിയാണ് ട്രെയിലര്‍ പുറത്ത് വിട്ടത്. ചിത്രം ജൂണ്‍ 10 ലോകമെമ്പാടുമുള്ള തിയറ്ററുകളില്‍ റിലീസിനെത്തും.

ചാര്‍ളി എന്ന നായ്ക്കുട്ടിയും നായകനും തമ്മില്‍ ഉണ്ടാകുന്ന സ്നേഹവും, ആത്മബന്ധവും അവരുടെ വൈകാരിക ബന്ധങ്ങളും ചേര്‍ന്നതാണ് ട്രെയിലര്‍. ഒരു നായയ്ക്ക് എത്രത്തോളം മനുഷ്യ ജീവിതത്തില്‍ സ്വാധീനം ചെലുത്താന്‍ കഴിയുമെന്ന് കുറച്ച് നിമിഷങ്ങള്‍കൊണ്ട് പ്രേക്ഷകര്‍ക്ക് മനസിലാകുന്നുണ്ട്.

എപ്പോഴും പരുക്കനും ഒറ്റപ്പെട്ട് ജീവിക്കുന്ന ധര്‍മ്മന്‍ എന്ന യുവാവിന്റെ ജീവിതത്തിലേക്ക് ചാര്‍ളി എന്ന നായ്ക്കുട്ടി കടന്നുവരുന്നതും പിന്നീടുണ്ടാകുന്ന നായകന്റെ ഇഷ്ടക്കേടുകളും പിന്നീട് നായകന്റെ എല്ലാമെല്ലാം നായയാകുന്നതും ട്രെയിലറില്‍ മനോഹരമായി കാണിച്ചിട്ടുണ്ട്. അവര്‍ പോകുന്ന യാത്രകളും, നായകന് ചാര്‍ളി എന്ന നായയുടെ പ്രാധാന്യവും ഈ ട്രൈയലറില്‍ പോലും അതിമനോഹരമായി ചിത്രീകരിച്ചിട്ടുണ്ട്. കാണുന്ന ആളുകളുടെ മനസ്സില്‍ ഒരു ചെറു നൊമ്പരമായി മായാതെ ഇരുവരുടെയും മുഖങ്ങള്‍ നില്‍ക്കും. വാക്കുകളാല്‍ പറഞ്ഞു തീര്‍ക്കാന്‍ പറ്റാത്ത ചില സന്ദര്‍ഭങ്ങളിലൂടെ കടന്നു പോയ ട്രൈയിലര്‍ ചിത്രം അതിഗംഭീരമായിരിക്കും എന്നതിന്റെ സൂചനയും തരുന്നുണ്ട്.

മലയാളിയായ കിരണ്‍രാജ് സംവിധാനം ചെയ്യുന്ന ചിത്രം പരംവഹ് സ്റ്റുഡിയോയുടെ ബാനറില്‍ ജിഎസ് ഗുപ്തയും രക്ഷിത് ഷെട്ടിയുമാണ് നിര്‍മ്മാണം ചെയ്യുന്നത്. രക്ഷിത് ഷെട്ടിക്കൊപ്പം സംഗീത ശംഗേരിയാണ് ചിത്രത്തിലെ നായിക. ‘777 ചാര്‍ളി’യുടെ മലയാളം പതിപ്പ് നടനും സംവിധായകനുമായ പൃഥ്വിരാജാണ് ഏറ്റെടുത്തിരിക്കുന്നത്.

Content Highlight – Official trailer of ‘777 Charlie’ released