കോട്ടയം മെഡിക്കല്‍ കോളേജിന് സമീപം വാണിജ്യ സമുച്ചയത്തില്‍ തീപിടിത്തം, ആളപായമില്ല

കോട്ടയം മെഡിക്കല്‍ കോളേജിന് സമീപം വൻ തീപ്പിടിത്തം. ആശുപത്രിയുടെ എതിർവശത്തുള്ള യുണൈറ്റഡ് ബില്‍ഡേഴ്സ് എന്ന് വാണിജ്യ സമച്ചയത്തിലെ തോട്ടത്തില്‍ സ്റ്റോഴ്സ് എന്ന കടയില്‍നിന്നാണ് തീ പടർന്നത് എന്നാണ് പ്രാഥമിക വിവരം. അഗ്നിരക്ഷാ സേന സ്ഥലത്തെത്തി തീ അണയ്ക്കാനുള്ള ശ്രമം തുടരുകയാണ്.

ഞായറാഴ്ച രാവിലെ 9.45-ഓടുകൂടിയാണ് തീപിടിത്തമുണ്ടായത്. ആശുപത്രിയിലേക്ക് ആവശ്യമായ മെത്ത, പായ, മറ്റ് അവശ്യസാധനങ്ങള്‍ എല്ലാം വില്‍ക്കുന്ന കടയിലാണ് തീപിടിത്തമുണ്ടായത്. തൊട്ടടുത്ത ഹോട്ടലിലെ ജീവനക്കാരാണ് ഈ കടയില്‍നിന്നും പുക ഉയരുന്നത് കണ്ടത്. ഉടൻതന്നെ അഗ്നിരക്ഷാ സേനയെ വിവരമറിയിച്ചു.

അഗ്നിരക്ഷാ സേന എത്തുന്നതിന് മുമ്ബുതന്നെ ഹോട്ടല്‍ ജീവനക്കാർ അവരുടെ പമ്ബില്‍ നിന്നും വെള്ളമടിച്ച്‌ തീ അണയ്ക്കാൻ ശ്രമിച്ചിരുന്നു. എന്നാല്‍ തീ ചുറ്റുമുള്ള കടകളിലേക്കും പടരുകയായിരുന്നു. അടുത്തുള്ള കടകളെല്ലാംതന്നെ പെട്ടെന്ന് തീപിടിക്കുന്ന വിധത്തിലുള്ള സാധനങ്ങള്‍ വില്‍ക്കുന്ന കടകളാണ്.

നാല് യൂണിറ്റ് ഫയർഫോഴ്സ് സ്ഥലത്തെത്തി തീ അണയ്ക്കാനുള്ള ശ്രമം തുടരുകയാണ്. കൂടുതല്‍ സഹായങ്ങള്‍ക്കായി അടുത്തുള്ള എ.ആർ. ക്യാമ്ബില്‍ നിന്നുള്ള പോലീസുകാരും സ്ഥലത്തെത്തിയിട്ടുണ്ട്.